Die splinternuwe HAT Afrikaanse skoolwoordeboek − ook in ’n kleiner formaat as die HAT Afrikaanse sakwoordeboek beskikbaar − bevat meer as 30 000 Afrikaanse woorde en hul verbuigings, idiome en vaste uitdrukkings.

Betekenisse word met behulp van eenvoudige definisies verduidelik en deur duisende natuurlike voorbeeldsinne en -frases en meer as 300 illustrasies toegelig. In ooreenstemming met die vereistes van die Nasionale Kurrikulum bevat die woordeboek ook inligting oor die herkoms van woorde, intensiewe vorme en manlike en vroulike vorme.

Sinonieme, antonieme en talle tesouruskassies help leerders hul woordeskat uitbrei, en ’n verskeidenheid kassies met nuttige inligting oor spelling en korrekte taalgebruik is ingesluit. Agterin die woordeboek is daar ’n uitgebreide lys Afrikaanse afkortings, plus ’n volledige lys terme wat leerders volgens die kurrikulum vir Afrikaans Huistaal en Afrikaans Eerste Addisionele Taal moet ken.

Die HAT Afrikaanse skoolwoordeboek en die HAT Afrikaanse sakwoordeboek is in skole getoets en word deur onderwysdosente en ervare onderwysers vir gebruik deur huistaalleerders van graad 4 tot graad 12 en leerders van Afrikaans as eerste addisionele taal vanaf graad 6 aanbeveel.

Hierdie Afrikaanse woordeboek met Engelse vertalings is gekonseptualiseer en wetenskaplik saamgestel vir leerders van Afrikaans as Eerste en Tweede Addisionele Taal.

Die woordeboek is geskik vir leerders van graad 4 tot graad 12 en maklik om te gebruik omdat dit agterin ’n lys van Engelse vertalings vir al die inskrywings bevat. Leerders kan dus eers die Engelse woord naslaan en dan na die regte Afrikaanse woord toe blaai om daar die definisie en voorbeeldsinne te lees.

Die woordeboek bevat 2 500 algemene gebruikswoorde wat gekies is uit die aanbevole kernwoordeskat vir leerders van Afrikaans as Addisionele Taal.

My eerste HAT is ’n uitsonderlike boek vir Afrikaanse kinders en kinders wat Afrikaans wil leer. Die volkleurboek, pragtig geïllustreer deur Paula Gerritsen, bevat die eerste 1000 woorde wat kinders kan sê, gegrond op wetenskaplike navorsing oor kindertaal. By elke woord is daar ’n vrolike rympie van twee tot vier reëls en ’n prettige volkleurillustrasie wat die betekenis verduidelik. Die boek kan op talle maniere gebruik word. By baie van die rympies kan ’n aktiwiteit saam met die kind(ers) gedoen word. Die rympies is gerig op interaksie. Dit is ’n raaisel of roep ’n vraag op. ’n Mens kan gebare daarby maak of ’n handeling naboots. Dit is maklik om ’n verband te lê tussen die rympies en die alledaagse leefwêreld van kinders, omdat die woorde uit die woordeskat van kinders self kom. Die voorlees van die rympies, die bekyk van die prentjies, die uitwys van voorwerpe en die gesels oor die onderwerpe dra alles by tot taalontwikkeling. Die boek stimuleer kognitiewe, sosiaal-emosionele en motoriese ontwikkeling en help kinders vlotter lees.

Hierdie blokraaiselboek is saamgestel met woorde uit die splinternuwe Blokraaisel-en-Rymwoordeboek, wat al die woorde uit die vyfde uitgawe van Afrikaans se gesaghebbendste verklarende woordeboek, die HAT, bevat.

Deur die blokkiesraaisels in die boek te voltooi, toets jy jou woordeskat aan Afrikaans se bekendste woordeboek. En niemand hoef te sukkel om die leidrade te ontsyfer nie, want elke woord is groot gedruk.

By die versameling is ’n verskeidenheid kopkrap-anagramme ingesluit, en, ter afwisseling, ook doolhowe en sudoku.

Met meer as 182 000 inskrywings is hierdie moet-hê-woordeboek reeds jare lank die staatmaker van elke blokraaiselliefhebber.